Mae'r Porthladd Rhydd Celtaidd yn croesawu'r cyhoeddiad gan Ystad y Goron, yn enwi Equinor a Gwynt Glas fel y prif ddatblygwyr ar gyfer y genhedlaeth nesaf o ffermydd gwynt alltraeth arnofiol (FLOW) yn y Môr Celtaidd.
Mae'n dilyn ymrwymiad diweddar Ystad y Goron o £400 miliwn i gefnogi cadwyni cyflenwi'r DU ac mae'n cyd-fynd â strategaeth aml-borthladd Llywodraeth Cymru i gyflawni FLOW, a ddatblygwyd drwy'r Grŵp Gorchwyl a Gorffen Ynni Gwynt Alltraeth.
Wrth wneud sylwadau ar y cyhoeddiad, dywedodd Luciana Ciubotariu, Prif Weithredwr y Porthladd Rhydd Celtaidd:
“Mae hyn yn nodi cam arwyddocaol arall tuag at harneisio cyfle diwydiannol y Môr Celtaidd. Gyda chadwyn gyflenwi gadarn wedi'i hangori gan ein porthladdoedd yn Noc Penfro a Phort Talbot, ac wedi'i hatgyfnerthu gan ymrwymiad ariannu Ystad y Goron, mae de Cymru mewn sefyllfa dda i ddod yn ganolfan hanfodol ar gyfer sector FLOW sy'n dod i'r amlwg yn y DU .”
Croesawodd Porthladdoedd Prydeinig Cysylltiedig (PPC) weinidogion Llywodraeth Cymru a'r DU, ynghyd â Dan Labbard , Prif Weithredwr Ystad y Goron, i Bort Talbot i ystyried cynlluniau trawsnewidiol PPC ar gyfer canolfan defnyddio a chadwyn gyflenwi FLOW. Gyda harbwr dŵr dwfn a thir helaeth y gellir ei ddatblygu, mae Port Talbot yn cynnig y raddfa sydd ei hangen i gynorthwyo dyfodol gwynt alltraeth yn y Môr Celtaidd.
Yn y cyfamser, mae Porthladd Penfro - sydd wedi'i leoli'n strategol ger parthau datblygu'r Môr Celtaidd - yn rhan allweddol o gynnig safle treth Porthladd Rhydd Celtaidd. Mae'r porthladd mewn lleoliad delfrydol i ddarparu gwasanaethau hanfodol, yn cynnwys ceblau, angorfeydd, ffabrigo, arolygu a chynnal a chadw.
