Heddiw, croesawodd y Porthladd Rhydd Celtaidd Dr Chris Martin OBE MStJ DL yn Gadeirydd Dros Dro Bwrdd Cwmni Cyfyngedig y Porthladd Rhydd Celtaidd, yn dilyn ymddiswyddiad Ed Tomp. Hoffa’r Porthladd Rhydd Celtaidd a’i bartneriaid ddiolch o galon i'r Cadeirydd sy’n ymadael, Ed Tomp, am ei arweinyddiaeth a’i gefnogaeth wrth arwain y tîm dros y 14 mis diwethaf.
Mae Chris Martin yn ymuno fel Cadeirydd Dros Dro, gyda gyrfa nodedig mewn swyddi arwain yn y maes porthladdoedd, ac ar draws y sectorau preifat, cyhoeddus ac elusennol.
Gwasanaethodd am 12 mlynedd fel Cadeirydd ac Is-gadeirydd Porthladd Aberdaugleddau, porthladd ynni blaenllaw y DU, lle bu Chris yn hyrwyddo adfywio, buddsoddi mewnol a gwydnwch cymunedol. Yn eiriolwr cryf dros ddatblygiad rhanbarthol, cefnogodd Fargen Ddinesig Bae Abertawe a bu’n rhan o'r tîm a helpodd i sefydlu’r Porthladd Rhydd Celtaidd i ysgogi twf economaidd ar draws De Orllewin Cymru.
Yn ogystal, gwnaeth gyfraniad sylweddol at fywyd cyhoeddus yng Nghymru, gan gadeirio pedwar sefydliad iechyd dros ddau ddegawd, ynghyd ag elusennau cenedlaethol a lleol ac ar hyn o bryd, mae’n cadeirio Hwb Gwyddorau Bywyd Cymru. Yn 2023, cafodd ei benodi yn Ddirprwy Raglaw ar gyfer Dyfed ac yn 2025, dyfarnwyd OBE iddo am wasanaeth nodedig i’r sector porthladdoedd a gwasanaethau morol.
Mae partneriaeth gyhoeddus-breifat y Porthladd Rhydd Celtaidd dan arweiniad Associated British Ports (ABO), Cyngor Castell-nedd Port Talbot, Cyngor Sir Penfro a Phorthladd Aberdaugleddau. Mae'r Porthladd Rhydd hefyd yn dwyn ynghyd datblygwyr ynni adnewyddadwy, cwmnïau ynni, cyfadeiladau diwydiannol, hybiau arloesi, sefydliadau academaidd a darparwyr addysg. Mae Cyngor Castell-nedd Port Talbot yn gweithredu fel y corff sy’n atebol am gyllid cyhoeddus.
