Heddiw, mae Porthladd Rhydd Celtaidd wedi cyhoeddi ei Gynllun Pum Mlynedd, gan amlinellu sut y bydd yn cyflymu buddsoddiad, yn creu swyddi o ansawdd uchel ac yn cryfhau safle De a Gorllewin Cymru fel canolfan flaenllaw ar gyfer ynni, gweithgynhyrchu a pheirianneg.
Mae'r Porthladd Rhydd wedi'i gynllunio i ddenu buddsoddiad i sectorau gwyrdd sy'n tyfu gan gynnwys tanwyddau carbon isel, gwynt alltraeth arnofiol, gweithgynhyrchu ynni glân a pheirianneg uwch. Gan ymestyn dros leoliadau yn Aberdaugleddau a Phort Talbot, mae'r Porthladd Rhydd Celtaidd yn bartneriaeth sector cyhoeddus-preifat sy'n cynnwys: Associated British Ports, Camplas, Dragon LNG, Impala, Ledwood Mechanical Engineering, Cyngor Castell-nedd Port Talbot, Porthladd Aberdaugleddau, RWE a Chyngor Sir Penfro.
Dywedodd Cathy Hall, Prif Swyddog Gweithredol Dros Dro Porthladd Rhydd Celtaidd : “Mae’r Cynllun Pum Mlynedd hwn yn nodi sut y bydd Porthladd Rhydd Celtaidd yn cefnogi busnesau ledled y rhanbarth i ddadgarboneiddio, tyfu a chael mynediad at gyfleoedd newydd. Byddwn yn canolbwyntio ar gyflawni prosiectau i atgyfnerthu dyfodol diwydiannol cryf y rhanbarth .”
Dros gyfnod o 25 mlynedd, rhagwelir y bydd Porthladd Rhydd Celtaidd yn darparu dros £8 biliwn mewn buddsoddiad ac 11,500 o swyddi.
